Bagi si ngelulus bangkar, si arah teruh idedeh, si arah datas niangkat
Ngandingken perukuren la bujur, la rembang tengah. Jelma si jore, ipejore, si mberat, iberati. Umpamana kalak si angkat telor man jelam si ganjangen asang ia. Tapi jelma si teruhen itokohina. Ngandingken timbangen perkara si bage tempasna, ningen : Ukum si taka buluh, si arah datas iangkat, si arah teruh idedeh

Bagi baning, setahun nangkeng-nangkeng sada wari ngincuah
Baning serbage (sejenis) lebo, inganna bas kerangen. Erdalan la pedas. Sada-sada penangkengen ndekah ia ndalanisa. Tapi adi perlu akapna guna ngkawali dagingna, igulungna bana. Erdelang me ia kusuah.
Andingenna, lagu mehuli mahan ate kalak jadi, ndekah erbanca. Tapi adi la metenget, lagu si mehuli si ertahun nuanca e, lasam kerina, perbahan sekali erbahan ceda.

Bante biang, mereng
Ido si mesera ngalokenca, perbahan akap peridon utangna e enggo utang si sia-sia.

Bante juljul, dapet ergana
Bante juljul emkap jukut si juljul-juljulken naring man kalak si deban, sabab bengkau e lanai keri. Asakai ate si nukur ergana ase, ndigan pe igalarina labo dalih. Enda biasa bas pantemen terpkasa, umpama kerbo megulang.
Biasa iandingken kujelma si la nai siat bas jabu (singuda-nguda si enggo mehuli dagingna). Ingan tersereh la nai milih, gelah anak enggo erbapa, gelah anak enggo ermerga. Emas unjuken la nai man perserewaten (perjengilen). Biasa ijuljulken kalimbubu ku anak beruna.

Adi la bage labo keri barang i tiga
Barang si kutera pe itiga lit nge si nukursa. Tiap barang, mehuli entah lahang, lit kalak si merlukenca.
Biasa iantusken kempak si medanak, ngatakenca kerina jelma lako. Bicara mejin pe sekali rupa, entah lagu kurang, lit ka nge kalak si rete ngena.

Tumburen Bareh
Sitik saja bareh, tertumbur minter mesui.
Ikataken man kalak si mesunah ukurna sigel. Sitik ibahan ceda man bana, minter ia mengil-ngil, meruntus.

Dengut-dengut bagi bareh pepulung nanah
Iandingken kempak peraten si mesui, ukur rembek-embek ibas sada-sada tangkelen.

Bagi si ngonggar batang buruk, adi nionggar getem si getemna, adi la nionggar macik si macikna
Kerna sada-sada tangekelen si serbut. Isingetken pe man teman erbanca ate morah ngenca, labo kena sampaten. Adi ierem-erem saja pe ibas ukur, ngalah ngukurisa.

Bagi si njujung batu, lalap mberat
Iandingken kempak baban nggeluh si mesera, lalap la lit si menahangna.

Bagi batu, kitik entah galang gia lau, lalap nge ia iteruh
Kerna kinigeluhen si mberat. Kumalih pe jaman, baban nggeluh la reh nahangna.

Bagi si ngayak batu megulang, ayak reh dauhna

Kerna sura-sura si la terayak-ayak. Umpama sekalak perbinaga. Akin ipebelin pasangenna, akin reh beratna man bana.

Bagi ancit, adi ersada rubat, adi sirang sidaramen, emaka inganna jumpa bas gebuk api
Andingenna, jelma jabu si rusur pejentik, rusur rubati adi ersada, tapi adi sirang sitedehen. Emaka bas kerja kesuhsahen rusur dalanna pulung, umpama kerja kepaten

Bas lau nari gara api
Si aturen pedameken reh pegebuken, maba pecah perang. Umpama bas ranan. Idilo anak beru pejoresa. Kerehenna la pekenaken tapi pegebukken, seh ranan e rontang.

Lain-lain babah nina babi
Antusenna, kerna nanam entabeh la seri man tiap jelma. Kai akap sesekalak entabeh, jelma si deban la ka mesegu.

Adi pirah babi, enggo kenca man nadahken pelangkah
Ikataken man kalak si kenca elah man minter medem. Rimahna la isapuina lebe, janah perpangan ipediatna ampar.

Bagi si njarumi baju, icaingi muat jilena. Dagangen ijampuli lebe maka ijadiken paken.
Enda biasa iandingken ibas runggun. Radu-radu encidahken ukur, mawen-mawen sisimbaken, gelah dat kesimpulen si mehuli.

Man anakna bagi bado
Ikuanken mak kalak singkuruk juak-juak entahpe pengikutna guna pejore bana.
Si des/seri : – Bagi biang kuring, man anakna

Bagi baling-baling, ija nari angin rembus, kuje alakenna
Iandingken kukalak si la tetap rukur. Apai si mbelinna kuasana ikapitina. Rimbang ras temanna ka akapna dalih adi nguntungkenlah man bana.
Si des/seri : – Bagi sanggar uruk-uruk, kuja angin rembus kuje ia mbole.

Biring-biring banban. Batang ban-ban mbiring, tapi melinang.
Ikataken kempak kalak si perbiring-biring rupana, ngena ate.
Si des/seri : – Biring-biring manggis, mbiring gia, adi entebu.

Erdire-dire iluhna bagi buah banban siteruk-teruken
Ikataken kukalak si perah perngandungna, la erpeltep iluhna cires mambur.

Iluhna bagi tangge banban nguda, dem-dem bas mata, tumbuk-tumbuk bas isang, pecah-pecah bas perampun
Ikataken kempak kalak si ndekah janah mehantu pertangisna.

Toton babi ku lesung
Ngataken sura-sura si tangkas, mesunah ngatusisa. Umpamana, anak perana kuta dauh reh tiap berngi ku sada kuta, tentu atena njumpai temanna erkuan.
Bagi babi, malar-malar anakna
Iandingken kempak pernanden si ngenehen ia labo min ate jadi, tapi ia ikelengi erkiteken sangapna mupus.
Erbuat bengket bagi tutup abal-abal
Ikuanken man kalak si pengelako pendahinna maka akapna reh beratna. Umpamana, icuba erbinaga ngelapas-ngelepasken nakan. Binaga rugi, tangkel utang.
Kelaling-kelaling bagi bunga abang-abang
Iandingken kempak jelma si lanai erturi-turin pergeluhna, lanai lit teman entah kade-kade sinampati.
Ajar bancina
Ibas sada-sada pendahin entah pe sada-sada tempas kinigeluhen siakap kita la ngasup ije. Tapi adi reh maksa kecibalen, ngasup kang kepeken. Umpamana, sesekalak la akapna ia ngasup erdalan ndauh, tapi kenca terpaksa ngungsi, kukerangen pe ngasup ka nge erjujung.
Siagengen radu mbiring, sikuningen radu megersing
Antusenna, adi sician-cianen, sipecat-pecaten, pekepar rugi, pekepar mbau. Tapi adi siajar-ajaren, sisampat-sampaten, pekepar merim, pekepar menahang.
Adi ngalo la rido, nggalar nge la rutang
Antusenna, adi la arah orat rejeki reh, la ka bo arah dalan sinanggel tangkel.
Ngkimbangi amak babo lubang
Andingenna, kalak si mehuli kal tempa ukurna adi niidah perbahanenna, kepe atena meneken.
Seran mate anak kalak asang anakta
Ndeharanta anak kalak. Antusenna, suin mate ndehara asang mate anak.
Bagi angguk-angguk pudi terang, iluh mambur la lit si ngapul
Kalak si ngandung tangis nandangi terang wari, nupung kepaten, nggit me la nai kenan apulen. Si aturna ngapul enggo munduk-unduk entah tunduh.
Iumpamaken ku jelma si kedabuhen sinanggel, tapi la lit sinami-namisa.

Bagi aringgeneng beru-beru, la neren
Iandingken ku jelma si la perpang, sitik pe kalak la mehangke. Biasa ikataken man anak perana, si la ibiari singuda-nguda sabap ngkuit pe la pang.
Labo terbuat ate tungir asa pungga
Antusenna, pemindon si kutera pe ibahan la terdemi, pemindon si lang-lang. Umpamana danak-danak ngandung, ipindona gelah itukur kuda.
Gerantang Acih
Ngataken jelma pergerantang, mehantu tempa, tapi situhuna ia percikcik.
Menang bas babah, talu bas perukuren
Ikuanken ku kalak si la lit pemetehna, tapi ngerana la nggit talu, ia tempa si beluhna. Gelah menang bas cakap, rugi pe ia nggit.
Babahna bagi bulan erlajar
Ngataken tempas babah mejile.
Adi kidaram salu babah, ndigan pe la dat
Ikataken ku jelma si la mejingkat kidaram. “Ija kin, ..la kap lit ije”, nina rusur. Biberna ngenca kemuit, tanna la cigargar, janah matana la metenget pepayosa.
Petembal bagi persepah babi
Ngandingken perukuren la des, entah pe silawanen. Umpamana, orang tua merincuh maka anakna mengketi sekolah guru. Ate anak, kujapa pe labo dalih, gelah ula ku sekolah guru.
La ngidah ikur babi pe
Ikataken kempak kalak si tutus kal atena erdahin. Pagi-pagi lampas ku juma, ikur babi pe lenga teridah. Karaben pe kenca gelap maka ku rumah, ikur babi lanai ka teridah.
Bagi babi Lau Baleng
Bagi babi Lau Baleng tersena galang janah mbur.
Ikateken kempak jelma si seh burna
Njula babi salu kedep
Ikuanken kempak jelma si la terjula. Bicara perbahan ate kalak nembeh pe maka ibere kalak, la mberat tanna ngalokenca.

Melas pe ningen api adi la icikep labo meseng
Piga-piga erbage kesusahen nggeluh, adi la ibahan sababna labo jumpa. Mesui gia ningen ibas tutupen, adi la ibahan dalin itutup, labo jelma itutup.
Adi pajek gara api, kugapa pe rubati
Gara api pajek adi si man tanggerenken la lit. Ertina, adi mesera kel baban nggeluh, nakan man pangan la lit, kutera pe labo i eteh mehuli.
Ngutkut bagi api bas segal
Ikataken ku jelma si permenek, nggit ngerem-ngerem ukurna. Atena segat entah morah-morahna ibuni-bunikenna. Seh mawen-mawen dagingna kertang itindan-tindan ukurna.
Keri-keri arang besi la tembe
Sibar ngasup enggo ikeriken, tapi sura-sura la seh. Umpama guna nekolahken anak, orang tua enggo tungtung kapur, lembu idayaken, sabah iputangken, tapi erkiteken anak la rate tutus, sekolahna la rasil.
Aras jadi Namo
Kalak si mesera babanna nggeluh jadi kalak bayak. Kebalikenna : Namo jadi Aras. Biasa ka ipersada, : Aras jadi namo, namo jadi aras. Ipake ngandingken kumalih jaman. Kalak si musil jadi jore, si jore salih ku mesera.
Ngasuhi anak arimo, jukut nakanna
Ikuanken ku jelma si la terasuhi perbahan seh royalna, la meteh mehuli.

Bagi si ngasuhi anak arimo, la lit nakanna, kita irigepna
Iandingken ku jelma si mesera manjangisa, janah adi la ibere, kita ikurukna entah duit ta i tangkona.

Bagi arimo natap tabe
Ningkalak, adi arimo ercurmin bas lau, megah akapna ngenehen rupana, seh lupa ndarami nakan. Ikuanken man jelma si labo entabeh babanna nggeluh, tapi la atena erdahin, perbahan jore akapna bana.

Bagi arimo tua-tua
Arimo tua-tua, janahna erdalan pe lit nge rusur sorana bagi sora kalak jungut-jungut.
Ikataken man jelma si mejungut, enggo me ia sinik nuate, jungut-jungut denga kang.

Bagi aringgeneng nandangi tongkap
Sorana nandangi tongkap, erdengung-dengung, sung megang sung lahang
Iumpamaken kusora kalak si nurdam mejile.