Bulung birah bulung parira,
Rimo mungkur mbelah itaka.
Pulung me sendah kita kerina,
Meriah ukur ersada

kata.Ikuit keroncong embus terompet,
Ntabeh sorna man beginken,
Cekoh koncang gargari dompet,
Ongkos mulih saja tadingken,

Enda itaka si rimo mungkur,
Bunga rampe man perpangiren,
Belasken kata turiken ukur
Bapa nande ole ketadingen

Kabang ndukur Kulau terue,
Ibas bernehna isuan lacina.
Ola min ukur ermbue-mbue
Nuriken gegeh asa bancina.

Ersuli tualah mumbang,
Bunga melati ibas galahna.
Ukur mehuli rikut numbang,
Ate nampati lalit salahna.

Mantek kuta mbelin gunana,
Inganta jumpa Dibata Bapa.
Rende ertoto megi pedah Na,
Rikut pe mindo pasu-pasu Na.

Keleng ate nandangi teman
Mehamat kata ntabeh ranan,
Lagu mehuli gelah ibahan,
Ibas pertingkah sejaga-jagan,
Ibas silitna siela-elan,
Radu irasken maba baban,
Nggeluh arus sipehaga-hagan,

Arus terbeluh kita erteman
Pekena-kena ncibalken ranan,
Langkah pandangan olah ibahan,
Ibas pusuh arus kap siangkan,
Sipersingeten ibas kelupan,
Jumpa simberat sikata-katan,
Di pangan ntabeh radu ipan.

Nggeluh sisada tentu melungun,
Lalit teman sikeleng-kelengen,
Kerina kalak siakap pandangen,
Kita saja siakap jadi ikuten,

Kune kita nggo erban salah,
Ola teridah biak pekulah-kulah,
Pertingkah olah mbuesa ulah,
Pengkebet pe ola bagi singulah,
Terus terang akuken me gelah,
Pusuh jadi salang, ukur pe meriah,
Rezeki pe tentu ertambah-tambah,
Ate malem pe nandangi turah

Baba cekala ku Tigajumpa,
Gelah situkur minak mentega.
Sepala nggo me kita jumpa,
Ersada ukur mantek gereja

Saringkulit taneh tenggiring,
Baba durian nukur kemeja.
Ola min lit sitading-tading
Muat bagin mbangun kuta

Ipakena baju er-renda,
Ertumba-tumba beras babana.
Kataken arena belasken arenda,
Erlumba-lumba pepulung dana

Meratah nina bulung cekala,
Nipe sore iteruh uratna.
Pepulung dana erpala-pala
Tentu me jore bagi oratna

Asar ndukur Asamkumbang,
Namopunti mbue bungana.
Ersada ukur raduken numbang,
Rikut nampati mbelin gunana.

Ersadalah arih ibas mbangun,
Ola mbiar mereken silitna.
Sebab bagi putiken terbangun,
Iputika maka tambah bulungna

Perbahanenta ngenca man usihen,
Ibas pengerana ia ersukaten,
La ngeranaken ia ersukaten,
Bagi rubia itengah kerangen,
Radu ia pe kap sitendengen,
Tapi jelma ibas kegeluhen,
Arus kapen sitalang-tatangen.

* Pt. Em. U. C. Barus
Adi menganjang babah ngerana
Erbelas kata La ngangkar bana,
Kata soranta siakapo sipayona,
La kepn ngasup kalak megissa,
Piah tuah me atena gila,
Bene pe dungna sikelna jumpa,
Dungna kita rukur sisada.

Tadingken gelah ukur meganjang,
Biak mekarus ola penjangjang,
Ngerana nigen ola megombang,
Ibas salahta nggit min ipandang,

Ola peturah ate kalak mamang,
Lagu langkah rusur La nembang,
Rikut pengkebet Ia tersuriang,
Gelah sempat kita terbuang,
Ate kalak nembeh segedang-gedang